ಭಾಗ್ಯಲಕ್ಷ್ಮೀ ಕಂಬಳಕಟ್ಟ ರವರು ಬರೆದ ಶಿಶುಗೀತೆ ಪಚ್ಚೆಗಿಳಿ

ಶಿಶುಗೀತೆ

ಶೀರ್ಷಿಕೆ: ಪಚ್ಚೆ ಗಿಳಿ

ಕಿಟ್ಟು ಪುಟ್ಟು ಸೇರಿಕೊಂಡು

ತೋಟಕೆಂದು ಹೊರಟರು

ಪಚ್ಚೆ ಗಿಳಿಯ ಅಲ್ಲಿ ಕಂಡು

ಹಿಡಿದು ಮನೆಗೆ ತಂದರು      ||

ಹಸಿರು ಮೈ ಕೆಂಪು ಕೊಕ್ಕು

ನೋಡಲದೆಷ್ಟು ಚೆಂದವು

ಇಟ್ಟರದಕೆ ಹೆಸರು ರುಕ್ಕು

ಆಡಲು ಬಲು ಆನಂದವು     ||

ಬಂಧಿಸಿದರು ತಂದು ಪಂಜರ

ಕಲಿಯಿತದು ಮುದ್ದು ಮಾತು

ನುಡಿಯದು ಬಲು ಸುಂದರ

ಮೈಮರೆತರು ಅದಕೆ ಸೋತು ||

ಮನೆಯಲಾರೂ ಇಲ್ಲದಿರಲು

ಕಳ್ಳ ಬೆಕ್ಕೊಂದು ಬಂದಿತು

ಅರಗಿಣಿ ಒಂಟಿಯಾಗಿರಲು

ತಿಂದು ತೇಗಿ ಮುಗಿಸಿತು         ||

ಮನೆಗೆ ಬಂದ ಕಿಟ್ಟು ಪುಟ್ಟು

ಸತ್ತ ಗಿಳಿಯನು ಕಂಡರು

ತಪ್ಪ ಮಾಡಿದೆವು ಬಂಧಿಸಿಟ್ಟು

ಎಂದು ಮನದಿ ನೊಂದರು     ||

✍️ ಭಾಗ್ಯಶ್ರೀ ಕಂಬಳಕಟ್ಟ, ಶಿಕ್ಷಕಿ, ಉಡುಪಿ.